პარლამენტის თავმჯდომარე არჩილ თალაკვაძე შეხვდა ევროპული საბჭოს პრეზიდენტს შარლ მიშელს, რომელიც საქართველოში ოფიციალური ვიზიტით იმყოფება. თალაკვაძემ მიშელს ვიზიტისთვის მადლობა გადაუხადა და აღნიშნა, რომ ეს ევროკავშირის მხრიდან საქართველოს ძლიერი მხარდაჭერის გამოვლინებაა. პარლამენტის პრესსამსახურის ცნობით, შეხვედრაზე საუბარი შეეხო COVID - 19-ის პანდემიის მხრივ საქართველოსა და ევროკავშირში არსებულ ვითარებას და ვაქცინის მოწოდების საკითხს. არჩილ თალაკვაძემ ევროკავშირს პანდემიასთან ბრძოლის პროცესში საქართველოსთვის გაწეული მხარდაჭერისთვის მადლობა გადაუხადა. შარლ მიშელმა აღნიშნა, რომ ევროკავშირი მაქსიმალურად შეეცდება საქართველოსთვის ვაქცინების მოწოდების პროცესის დაჩქარებას. მხარეებმა ისაუბრეს საქართველოში მიმდინარე პოლიტიკური პროცესის დარეგულირებაზე და პოლიტიკური დიალოგის მნიშვნელობაზე ევროკავშირის ჩართულობით. ქართულმა მხარემ ყურადღება გაამახვილა ოკუპირებულ ტერიტორიებზე არსებულ მძიმე ვითარებასა და რეგიონში მიმდინარე ცვლილებებზე. პარლამენტის თავმჯდომარემ ხაზგასმით აღნიშნა ევროკავშირის აქტიური ჩართულობის მნიშვნელობა კონფლიქტის მშვიდობიანი მოგვარების პროცესში და მიესალმა ევროკავშირის სადამკვირვებლო მისიის მანდატის 2022 წლის დეკემბრამდე გაგრძელებას. ქართული მხრიდან შეხვედრაში აგრეთვე მონაწილეობდნენ პარლამენტის ვიცე-სპიკერი პარტია „მოქალაქეებიდან" ლევან იოსელიანი, ევროპასთან ინტეგრაციის კომიტეტის თავმჯდომარე მაკა ბოჭორიშვილი, საგარეო ურთიერთობათა კომიტეტის თავმჯდომარე ნიკოლოზ სამხარაძე და ევროკავშირში საქართველოს წარმომადგენელი ნატალი საბანაძე. ევროპული საბჭოს პრეზიდენტი საქართველოს 28 თებერვალს, საღამოს ეწვია. შარლ მიშელის ვიზიტი მიმდინარეობს საქართველოში ბოლო საპარლამენტო არჩევნების შემდეგ შექმნილი პოლიტიკური კრიზისის ფონზე, რომელიც კიდევ უფრო გაამწვავა „ნაციონალური მოძრაობის“ თავმჯდომარის, ნიკა მელიას დაპატიმრებამ. მიშელი ვიზიტის ფარგლებში შეხვდა პრეზიდენტს, პრემიერ-მინისტრს ოპოზიციის წარმომადგენლებს. ის ასევე ჩავიდა საოკუპაციო ხაზთან. ...