შინაგან საქმეთა მინისტრი, ვახტანგ გომელაური აცხადებს, რომ არანაირ პრობლემას არ წარმოადგენს მისი პარლამენტში მისვლა და 5 ივლისს მომხდარის ახსნა დეპუტატებისთვის. „როცა დამიბარებენ, უნდა მივიდე. რა თქმა უნდა, ჯანმრთელობა თუ არ შემიშლის ხელს. არაერთხელ მივსულვარ. არანაირი პრობლემა არ არის, პირიქით, კარგი იქნება ზუსტად ავხსნა დეპუტატებთან, რა მოხდა და როგორ მოხდა“, - განაცხადა ვახტანგ გომელაურმა. შს მინისტრი აცხადებს, რომ ის ვერც წარმოიდგენდა, რომ ჟურნალისტებს ასე მასობრივად დაესხმებოდნენ თავს. გურჯაანში პოლიციის ახალი შენობის გახსნის შემდეგ, ვახტანგ გომელაურმა თქვა, რომ ძალოვან უწყებაში 27-წლიანი მუშაობის განმავლობაში ჟურნალისტებზე ძალადობა, ასეთი მასშტაბით, მას არ უნახავს. „რაც თქვეს ჩემზე, თითქოს მე გავეცი ბრძანება, რომ ჟურნალისტები ეცემათ და პოლიციელებს არაფერი მოემოქმედათ, ეს სისულელეა და არც მინდა მათ პასუხი გავცე, ვინც ეს განცხადება გააკეთა. დარწმუნებული ვარ, ამის თვითონაც არ სჯერათ“, - განაცხადა გომელაურმა. შს მინისტრისგან პარლამენტში მისვლა და 5 ივლისს მომხდარის შესახებ დაგროვილ კითხვებზე პასუხების გაცემა ოპოზიციონერმა დეპუტატებმა მოითხოვეს. ...