უნგრეთის პრემიერ-მინისტრმა ვიქტორ ორბანმა, რომელიც ცნობილია ევროკავშირის ზოგადი პოლიტიკისადმი კრიტიკული დამოკიდებულებით, სერბეთში ვიზიტის დროს განაცხადა, რომ ევროკავშირმა სერბეთი თავის რიგებში უნდა მიიღოს და განაგრძოს გაფართოება დასავლეთ ბალკანეთის მიმართულებით. 8 ივლისს ბელგრადში სერბეთის პრეზიდენტ, ალექსანდარ ვუჩიჩთან შეხვედრის შემდეგ გამართულ ერთობლივ პრესკონფერენციაზე, უნგრეთის პრემიერ-მინისტრმა განაცხადა, რომ შემდგომი გაფართოების გარეშე ევროკავშირმა შესაძლოა შეწყვიტოს განვითარება და დაიშალოს. „მე ერთმნიშვნელოვნად ვუჭერ მხარს სერბეთის ევროკავშირში გაწევრიანებას, რადგან ეს შედის დასავლეთ ბალკანეთის ინტერესში. ხოლო ევროკავშირმა უნდა გააცნობიეროს, რომ სერბეთი დასავლეთ ბალკანეთის საკვანძო ქვეყანაა“, - განაცხადა ვიქტორ ორბანმა. პოპულისტი ვიქტორ ორბანისა და ალექსანდარ ვუჩიჩის მიმართ ფრთხილი დამოკიდებულება აქვთ ბრიუსელში, სადაც კრიტიკულად ეკიდებიან ამ ლიდერების მიერ ნაციონალისტური კარტის გათამაშებას, დემოკრატიული ინსტიტუტების შეზღუდვას და რუსეთსა და ჩინეთთან სავაჭრო-ეკონომიკური თანამშრომლობის გაფართოებას. ...