გაეროს უშიშროების საბჭომ ორშაბათს მიიღო რეზოლუცია ღაზის სექტორში ცეცხლის დაუყოვნებლივ შეწყვეტის მოთხოვნით. დოკუმენტი მოითხოვს რადიკალური დაჯგუფება ჰამასის (შეერთებულ შტატებსა და ევროკავშირში აღიარებულია, როგორც ტერორისტული დაჯგუფება) მიერ მძევლად აყვანილი ისრაელელების დაუყოვნებლივ და უპირობო გათავისუფლებას. მიღებულ რეზოლუციაში გაერო მოითხოვს, რომ კონფლიქტის ორივე მხარემ შეწყვიტოს ცეცხლი მუსლიმთა წმინდა თვის, რამადანის (წელს 10 მარტიდან 9 აპრილამდე) განმავლობაში და უზრუნველყოს სექტორისთვის ჰუმანიტარული დახმარების შეუფერხებელი მიწოდება. მოზამბიკის მიერ წარდგენილი რეზოლუცია გაეროს უშიშროების საბჭოს ათმა წევრმა მიიღო. რუსეთი ცდილობდა ტექსტში ცეცხლის შეწყვეტის მოთხოვნას მსაზღვრელი სიტყვა "მუდმივი" დამატებოდა, რაც უარყოფილი იქნა. შეერთებულმა შტატებმა, რომელმაც მსგავსი რეზოლუციების განხილვისას ვეტოს უფლება სამჯერ გამოიყენა, ამჯერად თავი შეიკავა. მანამდე რუსეთმა და ჩინეთმა დაბლოკეს აშშ-ის მიერ გაეროს უშიშროების საბჭოსთვის შეთავაზებული რეზოლუციის წინა ვერსია. ასევე ნახეთ გაეროს უშიშროების საბჭომ ვერ მიიღო ღაზაში ცეცხლის შეწყვეტის შესახებ აშშ-ის მიერ მომზადებული რეზოლუცია მანამდე ისრაელი დათანხმდა აშშ-ის შეთავაზებას, გაათავისუფლოს დაახლოებით 700 პალესტინელი პატიმარი დაჯგუფება ჰამასის მიერ 2023 წლის 7 ოქტომბრის თავდასხმის დროს დაკავებული 40 მძევლის სანაცვლოდ. ამის შესახებ CNN-ის წყაროებმა და ისრაელის არაერთმა მედიასაშუალებამ განაცხადეს. რადიკალური პალესტინური დაჯგუფება ჰამასი ამ წინადადებას ჯერ არ გამოხმაურებია. ასევე ნახეთ ისრაელი თანახმაა, 700 პალესტინელი გაათავისუფლოს 40 მძევლის სანაცვლოდ ამ ინიციატივის ავტორია აშშ-ის ცენტრალური სადაზვერვო სამსახურის (CIA) ხელმძღვანელი უილიამ ბერნსი, რომელმაც ეს იდეა კატარის დედაქალაქ დოჰაში მოლაპარაკებების დროს წამოაყენა. აღნიშნულ მოლაპარაკებას ისრაელი და ჰამასი შუამავლების მეშვეობით რამდენიმე თვეა აწარმოებენ. სამხედრო ქმედება ისრაელმა დაიწყო ჰამასის მეომრების ისრაელზე თავდასხმის საპასუხოდ. 7 ოქტომბერს ისრაელის სამხრეთში შეჭრის შედეგად დაიღუპა 1200 ადამიანი, ხოლო 240 მძევლად აიყვანეს. ისრაელის არმიის მოქმედებას ღაზის სექტორში 32 ათასზე მეტი ადამიანი ემსხვერპლა. ღაზის სექტორში მძიმე ჰუმანიტარული ვითარებაა. ...