რუსმა ტელეწამყვანმა, კრემლის პოლიტიკის პროპაგანდისტმა ვლადიმირ სოლოვიოვმა „საზიზღარი ისტერიკა“ უწოდა უკრაინასთან მოსაზღვრე ბელგოროდის ოლქის მცხოვრებთა ჩივილს, რომელიც რუსეთის ამ რეგიონის მუდმივ დაცხრილვას უკავშირდება. სოლოვიოვმა თავის საავტორო პროგრამაში(Соловьев Live) 25 მარტს, საღამოს განიხილა რუსეთის ხელისუფლებისადმი ბელგოროდელების თხოვნა, რომ საკონცერტო დარბაზ „კროკუს სიტი ჰოლში“ ტერაქტის ფონზე, ბელგოროდს ნუ დაივიწყებენ. პროპაგანდისტმა ჟურნალისტმა მათ, „ვინც რაღაც არ იცის“, მოუწოდა, „ხმა გაიკმინდონ“. სოლოვიოვმა „პირუტყვები“ უწოდა მათ, ვინც სოციალურ ქსელებში წერს, რომ ფედერალურ ხელისუფლებას ბელგოროდი დაავიწყდა. როგორც დამოუკიდებელი გამოცემა „მედუზა“ წერს, ბელგოროდელები სოლოვიოვის წინააღმდეგ სოციალურ ქსელში(ВКонтакте) გაერთიანდნენ და გადაცემის კომენტარებში გაახსენეს, როგორ დადიოდა ბელგოროდში ჯავშანჟილეტით. პროპაგანდისტ ტელეწამყვანს შესთავაზეს „მყუდრო სტუდია“ ბელგოროდში გადაიტანოს და სამსახურში და სამსახურიდან საჰაერო განგაშის და სროლის ფონზე იაროს და ასე დაიძინოს და გაიღვიძოს. სოლოვიოვს მოუწოდეს, რეგიონში შვილებთან ერთად ჩავიდეს და „პირუტყვებს“ აჩვენოს სროლის დროს სწორად მოქცევის მაგალითი. ასევე ნახეთ რუსი მოხალისეები რუსეთის ტერიტორიებზე თავდასხმებს განაგრძობენ რუსეთის ბელგოროდის ოლქზე შეტევა 12 მარტიდან გააქტიურდა მას შემდეგ, რაც რუსი მოხალისეების შეიარაღებულმა ფორმირებებმა განაცხადეს უკრაინის ტერიტორიიდან საზღვრის გარღვევის შესახებ. რუსეთი უკრაინის არმიას ადანაშაულებს. კიევში აცხადებენ, რომ რუსეთის ტერიტორიაზე რუსი მოხალისეები მოქმედებენ. ბელგოროდზე თითქმის ყოველდღე ხდება რაკეტებით და დრონებით შეტევა. ადგილობრივმა ხელისუფლებამ რამდენიმე რაიონიდან მოსახლეობის ევაკუაცია განახორციელა. ოლქის გუბერნატორ გლადკოვის თანახმად, 12 მარტის შემდეგ დაიღუპა 20-ზე მეტი და დაიჭრა 100-ზე მეტი ადამიანი. ...