დიდი ბრიტანეთის უზენაესმა სასამართლომ WikiLeaks-ის დამაარსებელს, ჯულიან ასანჟს, უფლება მისცა, სააპელაციო სარჩელი შეიტანოს აშშ-ში ექსტრადიციის წინააღმდეგ. მას ამერიკაში ჯაშუშობაში სდებენ ბრალს. ორდღიან სასამართლოზე ასანჟის ადვოკატები ამტკიცებდნენ, რომ მათი კლიენტის მიმართ ბრალდება პოლიტიკურად არის მოტივირებული და მისი ექსტრადიციის შესახებ აშშ-ის მოთხოვნა უკანონოა. მოსამართლეებმა გადაწყვიტეს, რომ ასანჟი შეძლებს ამის მტკიცებულებების წარმოდგენას ახალ სააპელაციო სხდომაზე, თუკი აშშ-ისგან არ იქნება „დადებითი პასუხები“ შეკითხვებზე, გარანტირებულია თუ არა ასანჟისთვის სიტყვის თავისუფლება და ხომ არ ემუქრება მას სიკვდილით დასჯა. საქმის განხილვა 20 მაისს გაგრძელდება. ასანჟისთვის აპელაციაზე უარი რომ ეთქვათ, ის, შესაძლოა, რამდენიმე დღეში გადაეცათ აშშ-ისთვის. WikiLeaks-ის დამაარსებელს 17 ბრალდება აქვს წაყენებული ჯაშუშობაში და ერთი ბრალდება - კომპიუტერის არამართლზომიერად გამოყენებაში ერაყსა და ავღანეთში აშშ-ის საქმიანობის თაობაზე საიდუმლო დოკუმენტების გამოქვეყნებისთვის. ამერიკელი პროკურორები ამტკიცებენ, რომ ასანჟი აშშ-ის ყოფილ სამხედროს, ჩელსი მენინგს, დაეხმარა მოეპარა სამხედრო დოკუმენტები, რომლებიც შემდეგ WikiLeaks-ის საიტზე გამოქვეყნდა. ასევე ნახეთ ჯულიან ასანჟი - ვისთვის გმირი, ვისთვის არა წაყენებული ბრალდებების მიხედვით, ასანჟს აშშ-ში 175 წლით პატიმრობა ემუქრება. 52 წლის ავსტრალიელმა ჟურნალისტმა, რომელიც ექსტრადიციას გაურბის, შვიდი წელი გაატარა ლონდონში ეკვადორის საელჩოში, უკანასკნელი ხუთი წელი კი - ლონდონის ციხეში. ასანჟის ადვოკატები ამტკიცებენ, რომ ეს ექსტრადიცია პოლიტიკური შეხედულებებისთვის დასჯის ტოლფასი იქნება და დაარღვევს მის უფლებას სიტყვის თავისუფლებაზე. ავსტრალიის პარლამენტი გამოვიდა მოწოდებით, ჟურნალისტს სამშობლოში დაბრუნების უფლება მიეცეს. ასანჟის მომხრეები და ახლობლები შეშფოთებული არიან მისი ჯანმრთელობის გამო. მათი თქმით, ექსტრადიციის შემთხვევაში ის შეიძლება მოკვდეს. 2021 წელს საოლქო მოსამართლემ უკუაგდო აშშ-ის თხოვნა ასანჟის ექსტრადიციის შესახებ იმ ვარაუდით, რომ მან შეიძლება თავი მოიკლას, თუკი მკაცრი პირობების პატიმრობაში მოათავსებენ. 2022 წელს, მას შემდეგ, რაც აშშ-მა ასანჟის მიმართ ჰუმანური მოპყრობის გარანტიები გასცა, ბრიტანეთის შინაგან საქმეთა სამინისტრომ მოიწონა მისი ექსტრადიცია. ...