ევროპარლამენტარი მაიკლ გალერი აკრიტიკებს „ქართული ოცნების“ ხელისუფლებას „აგენტების კანონის“ ხელახლა ინიციირების გამო, ხელისუფლების წარმომადგენლებს „უცხოეთის გავლენის აგენტებს“ უწოდებს და ბიძინა ივანიშვილისთვის სანქციების დაწესებას ითხოვს. „არსებობს ვალდებულებები, რასაც [ხელისუფლების წარმომადგენლები] ხელაღებით არღვევენ“, - თქვა გალერმა 23 აპრილს სტრასბურგში, ევროპარლამენტის პლენარულ სესიაზე. „ჩემი შთაბეჭდილებით, თუკი უცხოეთის აგენტებზე ვსაუბრობთ, ერთადერთი უცხოეთის აგენტები მმართველ პარტიაში მყოფი ის ხალხია, ვინც „აკოპირებს“ რუსულ კანონებს და ხელს უწყობს ისეთ მმართველობას, როგორიც რუსეთშია, - შესაძლოა, მისი სახელითაც კი“, - განაცხადა გერმანელმა პოლიტიკოსმა, სოციალ-დემოკრატების ჯგუფის (S&D) წევრმა. გალერმა ახსენა პრემიერ-მინისტრი ირაკლი კობახიძის დაგეგმილი ვიზიტი უნგრეთში ულტრამემარჯვენე, „ანტიგლობალისტურ“ კონფერენციაზე პრემიერ-მინისტრი ვიკტორ ორბათან და თქვა: „მართლა მაინტერესებს, საით მიდის ეს ქვეყანა და მმართველი პარტია“. ასევე ნახეთ საქართველო არ უნდა ელოდოს ევროკავშირში გაწევრებას, თუ ამ კანონს მიიღებენ - ევროპარლამენტარი მიკსერი ევროპარლამენტარმა გალერმა ამის შემდეგ განაცხადა, რომ ევროკავშირში მხარს უჭერენ ქართველი ხალხის ამბიციებს, გახდნენ ევროკავშირის წევრები, და „სრული სოლიდარობა“ გამოუცხადა დემონტრანტებს, რომლებიც რამდენიმე დღეა, თბილისში „აგენტების კანონის“ წინააღმდეგ გამოდიან. მაიკლ გალერმა ასევე მოითხოვა ექსპრემიერი ბიძინა ივანიშვილისთვის სანქციების დაწესება და ექსპრეზიდენტი მიხეილ სააკაშვილის გათავისუფლება. დღეს, 23 აპრილს სტრასბურგში ევროპარლამენტის წევრები განიხილავენ საქართველოში ხელახლა ინიციირებულ „აგენტების კანონს“. ევროპარლამენტის ამავე პლენარულ სესიაზე მოითხოვეს პოლიციის მაღალჩინოსნებისთვის სანქციების დაწესება. ასევე ნახეთ ევროპარლამენტარებმა ივანიშვილის და პოლიციის მაღალჩინოსნების სანქცირება მოითხოვეს თუ „აგენტების კანონს“ საბოლოოდ მიიღებენ: დაუწესდეს სანქციები ბიძინა ივანიშვილსა და კანონის მხარდამჭედ პარლამენტარებს; გადაიხედოს საქართველოსთან სავიზო რეჟიმის ლიბერალიზაცია, შეუწყდეს ქვეყანას ევროკავშირისგან ფინანსური დახმარება - ევროპარლამენტი განიხილავს, რა ზომები მიიღოს „აგენტების კანონის“ პასუხად. ევროპარლამენტი გეგმავს, ხუთშაბათს, 25 აპრილს უყაროს კენჭი რეზოლუციას. ...