ჩინეთის ლიდერმა სი ძინპინმა, რომელიც საფრანგეთში იმყოფება ვიზიტით, 7 მაისს პარიზში გამართულ პრესკონფერენციაზე თქვა, რომ ჩინეთი უკრაინის საკითხზე საერთაშორისო სამშვიდობო მოლაპარაკებების მომხრეა. მისი თქმით, ჩინეთი „მხარს უჭერს სათანადო დროს საერთაშორისო სამშვიდობო კონფერენციის ჩატარებას, რომელსაც აღიარებენ როგორც რუსეთი, ისე უკრაინა და რომელიც უზრუნველყოფს ყველა მხარის თანაბარ მონაწილეობას და ყველა სამშვიდობო გეგმის სამართლიან განხილავს“. ასევე ნახეთ მაკრონი და ფონ დერ ლაიენი ჩინეთს მოუწოდებენ, რუსეთზე ზეწოლა განახორციელოს უკრაინის საკითხზე სი ძინპინის ვიზიტის მთავარი საკითხი არ ყოფილა უკრაინა, მაგრამ მან აღნიშნა, რომ პეკინი მხარს უჭერს ევროპაში „გაწონასწორებულ, ეფექტიან და მყარ“ არქიტექტურას და არ არის „უკრაინის კრიზისის“ არც ინიციატორი და არც მხარე. „ისტორია კვლავაც ადასტურებს, რომ საბოლოო ჯამში კონფლიქტების მოგვარება მხოლოდ მოლაპარაკებების გზით შეიძლება“, - განაცხადა სი ძინპინმა. ...